حتي أنتِ يا عايدة!

إستمعت مؤخراً لحوار إذاعي مع الفنانة (عايدة الأيوبي) علي إذاعة رحاب اف ام ..

الحقيقة أني صُدمت بتحول (عايدة) إلي الغناء الديني!
كنت سيبتي الموضوع ده لحد تاني يا (عايدة)!
كنت بمني نفسي بعودة للإستماع لصوتك اللي تقريباً ما جاش زيه من ايام التسعينات وشرايط الكاسيت ، لكن تروحي تغني "نهج البردة" ولا قصدية "التوسل" فده حرام بجد!

رغم كل ده ماقدرتش اني أكره توجهك الجديد ، لأني حسيت - برضه- بأنه مازال نابع من البراءة والشفافية الموجودة عندك ، لكن -برضه- لعنت كل المشايخ اللي إتأثرتي بيهم وخلوكي تعملي كده!

ليه بس كده يا(عايدة)؟
يارتني ما كنت عرفت إنك هاترجعي و فضلت بسمع الـ 3 شرايط بتوعك اللي عندي وبس!

تساؤلات ما قبل المحرقة؟

إمبارح كان يوم حافل جداً..

في البداية حدثت ما يشبه المعجزة وأفلت من كارثة ضابط الإحتياط في إستحضار لعدالة السماء التي تهبط علي إستاد الهايكستب -بدلاً من إستاد باليرمو-* .. في المساء حضرت فرح قريب من الدرجة الثانية في فندق من فنادق الخمس نجوم في القاهرة الجديدة.. أنا مش فقري والله وبحب أفرح وأروق نفسي بس إندهشت من نفسي بعد فترة لما حسيت بالغم في وسط فرح 5 نجوم ميزانيته لا تقل عن ربع مليون جنيه بأي حال من الأحوال!

البلد دي رايحة علي فين؟.. ما بين إضراب 6 إبريل ومظاهرات عمال المحلة اللي بتطالب بحد أدني من الأجور يساوي 1200 جنيه لإسرة لاتقل عن 5 أفراد إلي فرح مدته اربع ساعات تكفي لإعاشة 20 أسرة من من عمال ا غزل المحلة سنة كاملة..

أنا رايح الجيش بس عارف إنها هاتبقي من أسود فترات حياتي وعارف كويس أني بعد ما هاخلص هاسيب البلد وماشي وآلاف زيي هايعملوا كده وأغلبهم مهندسين ودكاترة ومؤهلات عليا..
المدونة ستشهد حالة خمول لمدة حوالي شهرين لحين العودة لكن ما زال السؤال يابني آدمين:

إحنا رايحين علي فين؟

*العبارة التي فتح الله بها علي "محمود بكر" فس ماتش مصر وهولندا في كاس العالم سنة 1990..

كيف تصبح ضابط إحتياط في 16 خطوة!

أخي المواطن الذكر من مواطني جمهورية مصر العربية نضع أمامك الدليل المرشد لكي تلبس البدلة العسكرية لمدة 3 سنوات بعد إنقضاء دراستك ، وإلتزاماً منا علي الدقة والتخصيص سردنا التالي:

1- إتخانق مع دكتور من دكاترة الكلية في سنة تانية ولا سنة تالتة وخليه يشيـّلك المادة طول ما هو مرزوع في الكلية لغاية ما تمتحن المادة دي في دور سبتمبر.

2- خلص مشروع تخرجك في شهر يوليو وافضل صايع لغاية شهر سبتمبر عشان تمتحن المادة اللي متخانق فيها مع الدكتور وأنت كل يوم بتدعي علي ميتين أم الدكتور وتتمني أن يتخرب بيت أمه بأي مصيبة.

3- يستجيب الله لدعائك -وهي المرة الأولي والأخيرة التي سوف يستجيب لك فيها- ويرحل الدكتور ليعمل في بلاد العلوج وتدخل أنت الإمتحان وتنجح.

4- تنتظر شهادتك النهائية التي سوف تأخذها في شهر نوفمبر وتعلم أن الدكتور العلق مازال موجوداً في الكلية فتدخل مكتبه وأنت تحمل شهادتك و تسب له مية ملة وتأخد بتارك البايت من حوالي 3 سنين وتخرج من مكتبه منتصباً القامة تمشي علي رأي "محمود درويش".

5- تستعلم عن معاد ذهابك للمحرقـــ... احم أقصد الجيش فيقال لك أن بداية التقديم ستكون في شهر يناير.

6- تحاول إستغلال الفرصة في التقديم لعدة شركات للعمل فيها إلي أن يأتي موعدك للجيش ، وبالفعل يتم قبولك في عدة أماكن لكن يظل سؤالهم العتيد: "فين ورقة التأجيل من الجيش؟".

7- تسب الدين للبلد و للشركات ومع ذلك تظل في نفس المسلسل الهزلي بتقديم السيرة الذاتية الخاصة بك لعدة شركات ويقبلونك لكن مع نفس السؤال العتيد.

8- تظل 3 شهور علي هذه الحالة إلي أن تذهب إلي كشف الجيش الطبي لكن يسبقها أساطير كونية في إستخراج شهادات طبية وفيش جنائي و فيش عسكري و تعامل مع حثالة الموظفيين الحكوميين.

9- تبدأ -مثلك مثل كل المصريين- بالبحث عن واسطة تخرجك من الجيش لكن تكتشف الحقيقة المرة أنه لا يخرج من الجيش إلا من له واسطة كبيرة جداً في الخدمة تخرجك طبياً ، لكنهم يقولون لك انهم يستطيعون أن ينزلوك من ضابط إحتياط لمدة 3 سنين إلي مجند يقضي المدة في 14 شهر.

10- تسلم بالأمر وتعطيهم أوراقك وتذهب ليوم إرجاء الجيش الذي يأخذون فيه بعض المواليد عشوائياً لتفاجأ أن دفعتك كلها مطلوبة كضباط إحتياط.

11- تسب الدين للبلد مرة أخري وتتصل بوسطائك الذين يطمئنوك ويعدونك بشرفهم أنك عسكري مجندي ولن تلبس بدلة الضباط ماداموا هم علي قيد الحياة.

12- يتصل بك وسطائك قبل نتيجة إعلان أسماء الضباط ويهنئوك بأنك أصبحت عسكري مجند وتلهث أنت بالشكر والثناء.

13- تتهور وتتصور أن مشاكلك حُلت وتفكر في الإرتباط بفتاتك مادام الأمر كله عبارة عن سنة وترجع إلي الحياة مرة أخري.

14- تذهب إلي أهل فتاتك وتجلس معهم وكلك ثقة في موقفك ووضعك وتبدأ في محاولة الإتفاقات وربط الكلام....إلخ

15- تذهب في يوم إعلان أسماء الضباط لتفاجأ أن اسمك علي رأس القائمة التي ستـُرحل لكلية ضباط الإحتياط فتسب الدين للبلد ولوسطائك ولأقربائهم حتي الدرجة العاشرة ثم تتقبل الأمر بهزلية علي أساس أن الموقف عبثي بدرجة غير متخيلة!

16- تكتب هذه التدوينة ناصحاً إخوانك في الذكورة أن يكونوا مطأطأي الرأس أمام دكاترة الكلية لديهم وأن يكتفوا بالشتيمة العادية لا بسب الدين لأن سب الدين يجلب الفقر وتنصحهم بالشخر بديلاً عنه حتي لا يصابوا بضغط الدم.

إلغوا يوم الجمعة يرحمكم الله!

قاعد بفقّر قدام الكمبيوتر لمجرد أني ما صليتش الجمعة بقالي أسبوعين ولو عدي الأسبوع التالت ستكون الخناقة الشنيعة بيني وبين أمي!

أمي الحبيبة:
أنا بقالي سنة تقريباً ما دخلتش جامع ولا صليت جمعة لأن الحياة ما تستحملش خطبة جمعة كمان!
أنا بس مش عايز أركبك الهم علي ابنك اللي إنتي ها تعتقدي إن دماغه باظت ومهما حاولت افهمك إني زهقت من حكاية فريق الهلال والصليب دي ها تعتبري كلامي مجرد هرطقة.
هاروح كالعادة أشتري الجرايد وأشرب كوباية التمر هندي المقدس من أخر محل قصب في منطقتي لمجرد أني أمضي الوقت وبعدها أتحجج اني صليت في الزاوية القريبة اللي بتخلص الخطبة في تلت ساعة!

عايز أهج!

كده كتير يا رب!

أنا إتعلمت 17 سنة منهم 6 سنين هندسة كانوا من أرزل سنين حياتي وبعدين تضيع مني 4 فرص شغل ما يتعوضوش عشان قاعد في بيتنا مستني الجيش 7 شهور وبعدين في الأخر أبقي ضابط إحتياط!
لأ كده كتير فعلاً!

حتي البنت اللي ما صدقت لقيتها شكلها هي كمان ها تروح من إيدي ، طول عمري بقول لأمي أنا حياتي مش هنا ، وطول عمرها تقولي أنت براوي!
حتي هي قالت لي أنت مش عايز حاجة من هنا.

أخر ما كان يربطني بهذا الوطن هو إحساس معين بأني مدين له بجزء من حياتي ، لكن دلوقت هأديها زي الشيك اللي كان مؤجل الدفع وبعدها هاكتب مع الوطن مخالصة و كل واحد يروح لحاله!

مش عارف هي اللي جت في وقت غلط ولا أنا اللي جيت في وقت غلط ولا أنا كنت بلعب مع القدر بوكر وطلع في الأخر معاه "رويال فلاش" وأنا طلع معايا "فلاش" بس!

بالأمس حلمت بك

عقلي الباطن اللعين ما زال مصر علي أنها موجودة في حياتي..

أقنعت نفسي في لحظات اليقظة أن كل شيء إنتهي وأنه لم يكن في الإمكان أفضل مما كان ، لكن في عالم الأحلام كانت زائرة دائمة لأحلامي..

دائماً ما تزورني في احلامي بصفة مستديمة ، دائماً ما تظهر في أحلامي كل اللحظات السعيدة التي قضيتها معها طوال 5 سنين كاملة.. حتي بعد أن أقنعت عقلي الباطن أن يكف عن هذه الألعاب فإنه -المرواغ- أعطاني مهلة مزيفة إلي أن أستيقظت اليوم علي أنغام أغنية "أغنية أنا لحبيبي" لفيروز! بدل ما يوقظني علي أنغام "لا إنت حبيبي ولا ربينا سوا"! ..

* العنوان مقتبس من تدوينة لـ عايشة وخلاص التي بدورها مقتبسة من مجموعة قصصية لبهاء طاهر.

فنيتو!

في هذه اللحظات الحاسمة من تاريخ أمتنا المجيدة:
أخيراً إتخرجت وأصبح من حقي أن أقول بمنتهي الألاطة "أنا المهندس مع نفسه علي سن ورمح"!
ورقصني يا جدع ..

جواز صالونات

أختي متقدملها عريس جواز صالونات تقليدي ، بصراحة أنا مش داخل دماغي وماما بدأت في تراث الأمهات المصريات علي غرار ادي لنفسك فرصة وبلاش تتبطري علي حد ، لحد هنا عادي لكن اللي غاظني بجد بابا يقولها ده حافظ القرآن ودي ميزة قليلة في شباب اليومين دول !

ليه كده يا حاج؟

الظاهر ان النظام اليومين دول جمع النقط تكسب عريس!

قلب فاضي

الحقيقة التي تعلمتها هي أن الإنسان لا يقتنع إلا بما يريد الإقتناع به ..مهما كان ذكياً أو عبقرياً فهو يحتفظ بجزء من عقله في معزل عن المنطق ، ومهما جئت له بأدلة فأنه لا يقتنع .. لولا هذا لما وجد علماء (طبيعة نووية) هنود يبكون بإيمان أمام صورة كالي ويركعون أمام الأبقار ..

..إقتباس من العدد 47 من سلسلة فانتازيا لد.أحمد خالد توفيق

أشعر بأنه تم إستنفاذ جزء كبير من طاقاتي في محاولة إقناع فاشلة ، لدي قدر من الكآبة أعتقد أنه لن يمحوه إلا نشاط ذهني يستولي علي وأرجح أن يكون مشروهع التخرج لي في الكلية ..

ولكن كما قال منير : حد عايز قلب فاضي ؟ ، انا برضه بقول كده بس بشروط من اهمها : ان تكون خالية تماماً من عقد الإنثي المصرية والعربية الخاصة بتقاليد ولوازم الخطوات السعيدة ، وان تكون علي استعداد لتقبل نظرتي للدنيا والدين والمجتمع المحيط ، والأهم أن يكون عقلها أكبر من أي تفاهات ..

عارفين المستحيلات الاربعة ؟
بس كده

خلص الكلام ..

خلص الكلام كله
قلبي انا ملّه
آسي في هواه وتعب معاه ولا حس بيا
كان كل شيء ليا وجرح كتير فيا
شوف كام سنة آه م اللي انا شفته بعيني
مين ده اللي يرضي كده يجرالي كده بقي ذنبي كده علشان بهواه
اديته قلبي انا وحياتي انا وتعبت بقي ودي تبقي حياة

زادت جراح قلبي ولو الغرام ذنبي توبة خلاص قلبي ياناس هايبيع هوايا
وهايجري ايه يعني لو كان في يوم باعني لسه السنين جايه كتير مش هي دي النهاية
مين ده اللي يرضي كده يجرالي كده بقي ذنبي كده علشان بهواه
اديته قلبي انا وحياتي انا وتعبت بقي ودي تبقي حياة

للأستماع

حزين ..

بعد قصة حب لمدة 4 سنين ، اعتقد أنني في طريقي لإنهاء العلاقة دي بسبب تفكير متعنت غبي مفروض علي العرب والمصريين عند الجواز ، نصيحتي لأي شخص ناوي يتورط في حاجة زي كده : شوف أهل الطرف التاني الاول قبل ما تشوفه هو ، لانك في الأخر هتلاقي انه في فترة من الفترات بيبقي في ايدهم كل حاجة وانت تكتفي بخبط راسك في الحيط ، عالم وسخة !

I’m OK, You are NOT OK

بإقتباس من مدونة (سامحوني ماكانش قصدي) * :

I’m OK, You are NOT OK

بيقولوا ف علم النفس، إن أصعب حالة نفسية ممكن يكون فيها شخص هي:

هي إنك تبدأ تحس، إن انت كويس، وحلو، وبتعمل اللي عليك، إنما اللي حواليك دول مش بني آدمين، ايه اللي بيعملوه ده؟؟ بيفكروا بأنهي شكل؟؟ ليه مش قادرين يبذلوا المجهود اللي بتبذله؟ ليه مبيفهموش زي ما انت فاهم؟؟ عمرك ما هتقدر تتحسن بالشكل ده... عمرك ما هتطلع من الحفرة دي طول ما الناس دول في حياتي.... إلخ

انتهي الإقتباس ..

أكاد أجزم أن الحالة دي منتشرة بشدة في المجتمع المصري ، علي كل المستويات ، بداية من أعلي سلطة في البلد لغاية الأب في عيلته الصغيرة ، فكرة أن يتمحور كيان مجموعة من الأشخاص حول شخص واحد مصيبة سودا والمصيبة الأكبر أنك تجد اللي يقوله انت صح ،دول كلاب ما بيفهموش ولا مقدرين النعمة اللي هما فيها ، كفاية مثلاً تيجي تعمل مظاهرة ، تلاقي اللي حوالين الريس يقولوا : دول كلاب ومش عارفين مصلحة نفسهم ، ابن ما يعترض علي تصرفات ابوه تلاقي الام وبقية الإخوات يقولوا للأب : ده جاهل ، ده حمار ما يعرفش ايه الكلام اللي بيقوله ، انت هاتمسك علي كلام واحد مجنون مش عارف قيمة اللي هو فيه ؟!
طبعاً في الحالتين : الناس بتوع كفاية بتخبط دماغها في الحيطة ، والواد برضه ممكن يبقي في عقل باله بيقول : علي النعمة انتوا اللي مجانين !

ضيف علي النظرية دي بقي نظرية (واطيعوا الله والرسول وقولي الأمر منكم ) الشهيرة مع إتحادها مع الفقه الوهابي الوسخ ، يبقي انت وصلت لمجتمع من البصمجية كل همه يشوفله حد ياخد منه الاوامر وهو ما يتحملش مسؤلية ، ماهو الريس بتاعه هو اللي امره بكده !

عارفين المشهد الشهير :
إدعوا للعمدة إدعوله ..
يخرب بيت أبوه

*من تدوينة (نهاية سامحوني ماكانش قصدي)

سؤال !

بعض الأوقات بتحس ان الدنيا كلها واقفة قدامك ، انك كل ما تطلع من حفرة تقع في دحديرة ، ياتري انتوا بتعملوا ايه في مثل هذه المواقف ؟

ويقولك البنات ليه ما بتتجوزش ؟!

القانون الأول :

بناتي مش أقل من بنات فوزية البرجوازية !!

أنت عايز الناس تاكل وشنا يابني !

القانون التاني :

حفلة الجواز هي الفرحة اللي متبقية للبنت
طول عمرها ، واللي بتفضل مستنياها طول عمرها !

القانون التالت :

يابني احنا بنشتري راجل ، مهر بنتي
وشبكتها تقلها دهب ، وانت واخد بالك طبعاً !

القانون الرابع :

ماهو لو عملت لك كل ده يبقي هانتجوز كمان
عشرميت سنة وهناكل طوب وزلط إن شاء الله !

وبناء علي القوانين اعلاه :

لكي أن تختاري أنستي المبجلة بين شغل فوزية البرجوازية وحلق حوش أعلاه ، وبين أنك تتجوزي الانسان اللي اخترتيه وهو اختارك ، يا إما تفكك من السيرة دي وتروحي تشوفيلك شوفة تانية ، وإبقي قابليني !

*أي تشابه بين القوانين دي وحال أي حد بيقرأ التدوينة أو صاحبها لا محل له من الإعراب ، وأحسن له يتغطي كويس بالليل