إلغوا يوم الجمعة يرحمكم الله!
قاعد بفقّر قدام الكمبيوتر لمجرد أني ما صليتش الجمعة بقالي أسبوعين ولو عدي الأسبوع التالت ستكون الخناقة الشنيعة بيني وبين أمي!
أمي الحبيبة:
أنا بقالي سنة تقريباً ما دخلتش جامع ولا صليت جمعة لأن الحياة ما تستحملش خطبة جمعة كمان!
أنا بس مش عايز أركبك الهم علي ابنك اللي إنتي ها تعتقدي إن دماغه باظت ومهما حاولت افهمك إني زهقت من حكاية فريق الهلال والصليب دي ها تعتبري كلامي مجرد هرطقة.
هاروح كالعادة أشتري الجرايد وأشرب كوباية التمر هندي المقدس من أخر محل قصب في منطقتي لمجرد أني أمضي الوقت وبعدها أتحجج اني صليت في الزاوية القريبة اللي بتخلص الخطبة في تلت ساعة!
هناك تعليقان (٢):
انت عارف .. واحد صاحبي مرة كان ماشي مع شخص كفيف أزهري .. وكان بيوصله فصاحبي استغلها فرصة وسأله سؤال، قال له ليه بأحس إني مكسل أروح أصلي في المسجد، وكأني مش عاوز أروح أصلي هناك؟!!
قال له مش انت اللي مش عاوز تروح تصلي، جايز ربنا هو اللي مش عاوزك تقابله.
مش عارف إيه لازمة إن حضرتك تقول وتعلن إنك حتى ما بتروحش المسجد نص ساعة في الاسبوع، علشان صلاة أو خطبة جمعة، وكل اللي حضرتك كارهه هو الخطبة أو عتاب الوالدة الكريمة، لكن ليه ما تحاولش تشوف قسوة قلبك تجاه الصلاة دي جاية منين؟ ليه ما تدعيش ربنا إنه يهديك وإن صلاة الجمعة دي بدل ما انت بتكرهها، تنتظرها من الأسبوع.
حاول تدور على خطيب جمعة كويس لا يشعرك بملل الجلسة أو تعب من طول الخطبة
وبإذن الله ربنا سبحانه وتعالى يهديك وتحاول تتقرب منه أكثر
هداكم الله وإياي
alfirjany:
الحب والدين وأذواق لا تخضع لأي تعميم..
كل اللي بيحصل هو مساحة من الحرية الشخصية لا أكثر ولا أقل.
نورتني
إرسال تعليق