فضفضة واحد قرفان (1)

كنت فاكر نفسي اني مع الوقت بقيت بمارس احساس اللامبالاه بإمتياز ، الواحد بيسمع خير ، يتحرق دمه ، وبعدين -هوب- هموم الحياة تنسيه ..
لكن للأسف من ساعة حكاية شرقاوي واللي حصله الإكتئاب موجود ومعشش جواي مش عايز يروح ، لا إمتحانات نافعة انها تلهي الواحد ولا أي حاجة تانية نافعة ..

صديق عزيز كنت بتناقش معاه اننا هانهاجر مع بعض اما نتخرج ، لقيت نفسي بقول له : طب ماحنا لازم نرجع ، اصحابنا واهلنا وناسنا هنا ، انا اللي ماكانش فارق معايا بدأت أكتشف الحقيقة دي في نفسي ! ، للأسف مش عارف أستغني عن البلد دي ، لكن في نفس الوقت البلد دي بقت بتخنق ، مليون ومليون مظهر يومي يخليك تكره حياتك ، بلاش السياسة ، خليك في الناس ، قيم الاستهتار واللامباله والمشي في سير القطيع وعدم القدرة علي الوقوف في وجه الظالم بقت مسيطرة حوالينا ، بقي الحق والنظام والرأي كل ده كلام فاضي ، وياعم عيش وسيبك من وجع الدماغ ده !

المشكلة اني مريت بتلات مراحل : الأولي هي الإنتماء وذكريات الطفولة الغريرة ، التانية الخروج علي نظام المجتمع الغبي اللي حوالينا ، والتالتة الاحساس بكل ما حولك بمنظور اشمل واوسع ..
هل احنا فعلاً شعب وسخ وما ينفعش يجي الا بالكرباج ؟
هل احنا ما فيش امل فينا خلاص لا سياسة ولا علم ولا اخلاق ولا أي حاجة ؟
للأسف إلي الآن :ايوة ، إحنا كده ، لكن تعمل ايه في الجزء ابن الكلب اللي جواك بيربطك بالبلد دي ؟

مدد ...............