داليدا
علي الرغم من عدد أغانيها علي جهازي لايتعدي ال 6 إلا أني مازلت مفتون بهذا الصوت الاسطوري..
واحد من أهم أسباب إنبهاري بـ "داليدا" ادائها للكوكتيل الرائع : وطن مشتاقة إليه ، حبيب تود العودة إليه ، وصف مصر...
مش بالكلمات الهابلة - اللي بتشّل أهلي - بتاعت اليومين دول ..
بصراحة كل ما أكره البلد دي أسمع أغنية "أحسن ناس" ، بالرغم من الشوفينية في أننا أحسن /اجدع /ألطف ناس لكن أستمتع جداً بها لأنها تصف مصر من جوا ، بحس انها المقابل الغنائي لكتاب (مصر من تاني) لعمنا الكبير ""محمود السعدني" ..
بمناسبة الأغاني الوطنية العبيطة ، فاكر مرة وانا صغير بدأنا نقلد "محمد ثروت" في الإغنية بتاعت (مصر يأول نور في الدنيا) وأنشدنا الآتي :
مصر يا أول نور في الدنيا سرقها حرامي بالليل
سرق القلة وقال ياحلولة وراح يملاها م النيل
حرامي من هنا وحرامي من هنا ..
ليه أسكت أنا وما قولش وأعيد
يامراتي ياقدرة مصدّية
ياولادي ياشلة حرامية
ياحماتي يافنبلة ذرية
قارن الهجص اللي فوق بكلمات من نوعية
إسكندرية أحسن ناس
ع البحر ماشية تتمخطر
من سيدي بشر لابوالعباس
ايّوه ياعالم ع المنظر
ايّوة ياعالم ع المينا
والشوق بيتمرجح بينا
وتلتمية الف سفينة
عالبحر ماشية بتزمر
يانازه حي الجدعان
حي العرايس والعرسان
محروسة م الانس و م الجان
ياحلوة يام التوب الاخضر
أما انا من شبر
في مصر وولادها الطعمين
زي القمر بعيون سمرا
لابسين عقود فل وياسمين
والنيل بيضحك ويغني
فاكرني وبيسأل عني
أروحله القاه مستني
وجنب منه أحسن ناس
الله عليكي ياداليدا
الوصلة دي فيها كام اغنية لـ "داليدا" بجودة ريال بلاير ، لكن مافيهاش أغنية (أحسن ناس) ، لو حد عايزها أو عايز أغنية تانية بجودة ام بي ثري يبقي يقولي ، وانا ابقي ارفعها له واديله اللينك :)
ابقوا اسمعوا اغنية سالمة ياسلامة وادعولي ..
هناك ١٤ تعليقًا:
تصدق. كنت لسه بسمع سالمة يا سلامة من مدة بسيطة... الله يرحمها صوتها مميز
وماله يافندم ، إسمع براحتك ^_^
ماعندكش اغاني تانية ليها غير اللينك اللي انا حطيته ؟
اتفضل يا سيدي
http://egyptian2.salmiya.net/songs/dalida/
صباحو فل
متشكرين يابيه علي المجهود :)
صباح القشطة
http://a3z-elnas.blogspot.com/
انت ممكن تلاقى هنا تذوق لنوعية من الاغانى تفكرنا بزمن الفن الجميل
adhm:
متشكرين ياباشا علي المجهود ، ويجعله عامر
انت فعلا اخترت صح
انا بفكر اسمع داليدا النهلرده لانى رايح الجيش بكره
اكيد هاتحطنى فى جو تمام و تحوش من عندى تكديرة الدماغ دى
داليدا مطربة متميزة
بس لية بتسمى الاغانى الوطنية عبيطة
التشوية المذكور اللى عملة احنا لينا دور فية
لكن انا اتعبر كل اغنية وطنية نراس من امل يشد الى الامام
شكرا على البوست
و أنا كمان بشاركك حبك لداليدا لنفس الأسباب خصوصاً لما الواحد بيجرب الغربة بيحس الأغاني دي قوي
.
أنا بعتبرها أغاني رومانسية في حب الوطن
انا بصراحة بعشق حاجة اسمها داليدا اجمل صوت اجمل احساس اجمل اغانى ربنا يرحمها بحب اووووى اغنية حلوة يا بلدى بحبها اوى بحب فيها بلدى بجد ودى احس انها اجمل اغانيها
على فكرة انا عندي ليها اكتر من 70 اغنيه
ايميلي لمحبي دالبدا Dot_Com_a1@yahoo.com
انا برضه بحب داليدا جدا و من اكترهم اغنية je suis malade بجد الاغنية معمولة باحساس عالي اوي و كلمات جامدة جدا .. و ليها اغنية برضه مع alan delon باسم paroles paroles اغنية جامدة جدا جدا برضه .. و كفاية انها من داليدا ..
بحب داليدا
بحب صوتها و بحب أغانيها
رغم إنها إنتحرت قبل ما أنا أتولد ب5 سنين
بس صوت مثل صوت داليدا هيفضل عايش
كفاية إنك تسمع حلوة يا بلدي يرجع الدم يجري تاني في عروقك و تقولها بأعلى صوتك بحبك يا مصر
أو تسمع أحسن ناس أفتخر إن أصولي من سوهاج رغم إن والدي أساساً عمرة ما راح هناك بس سوهاج عروسة النيل وأفتخر إن حاضري في إسكندرية
اللى ماشية تتمخطر
أو تسمع سالمة يا سلامة
رغم إني أصلاً مبسمعش أغاني كتير لاكن أمام داليدا مقدرش لازم أسمع
يااااااااااااه
يا ريتني عشت أيامك يا داليدا
بحبك يا داليدة
إرسال تعليق