٠٧‏/٠١‏/٢٠٠٦

داليدا

علي الرغم من عدد أغانيها علي جهازي لايتعدي ال 6 إلا أني مازلت مفتون بهذا الصوت الاسطوري..

واحد من أهم أسباب إنبهاري بـ "داليدا" ادائها للكوكتيل الرائع : وطن مشتاقة إليه ، حبيب تود العودة إليه ، وصف مصر...

مش بالكلمات الهابلة - اللي بتشّل أهلي - بتاعت اليومين دول ..

بصراحة كل ما أكره البلد دي أسمع أغنية "أحسن ناس" ، بالرغم من الشوفينية في أننا أحسن /اجدع /ألطف ناس لكن أستمتع جداً بها لأنها تصف مصر من جوا ، بحس انها المقابل الغنائي لكتاب (مصر من تاني) لعمنا الكبير ""محمود السعدني" ..

بمناسبة الأغاني الوطنية العبيطة ، فاكر مرة وانا صغير بدأنا نقلد "محمد ثروت" في الإغنية بتاعت (مصر يأول نور في الدنيا) وأنشدنا الآتي :

مصر يا أول نور في الدنيا سرقها حرامي بالليل
سرق القلة وقال ياحلولة وراح يملاها م النيل
حرامي من هنا وحرامي من هنا ..
ليه أسكت أنا وما قولش وأعيد
يامراتي ياقدرة مصدّية
ياولادي ياشلة حرامية
ياحماتي يافنبلة ذرية


قارن الهجص اللي فوق بكلمات من نوعية

إسكندرية أحسن ناس
ع البحر ماشية تتمخطر
من سيدي بشر لابوالعباس
ايّوه ياعالم ع المنظر
ايّوة ياعالم ع المينا
والشوق بيتمرجح بينا
وتلتمية الف سفينة
عالبحر ماشية بتزمر
يانازه حي الجدعان
حي العرايس والعرسان
محروسة م الانس و م الجان
ياحلوة يام التوب الاخضر
أما انا من شبر
في مصر وولادها الطعمين
زي القمر بعيون سمرا
لابسين عقود فل وياسمين
والنيل بيضحك ويغني
فاكرني وبيسأل عني
أروحله القاه مستني
وجنب منه أحسن ناس

الله عليكي ياداليدا

الوصلة دي فيها كام اغنية لـ "داليدا" بجودة ريال بلاير ، لكن مافيهاش أغنية (أحسن ناس) ، لو حد عايزها أو عايز أغنية تانية بجودة ام بي ثري يبقي يقولي ، وانا ابقي ارفعها له واديله اللينك :)

ابقوا اسمعوا اغنية سالمة ياسلامة وادعولي ..

٠٥‏/٠١‏/٢٠٠٦

شرشر لبس الخازوق



إلي مزبلة التاريخ ياشرشر ، فقط أتمني تعيش لك كام سنة كمان تتحسر فيهم علي حالك ، وبرضه مش هايبقوا كفاية

عقبال اللي في بالي كلهم !

آه ياولاد الغبية !

إعذروني علي العنوان الصادم ، لكن ده أكتر حاجة مهذبة ممكن أقولها للي بيعملوه الأغبيا بتوع حركة الجهاد الفلسطينية ..

الله يرحمه "السادات" قال : الشعب المصري زي الزنبرك ،طول مانت ضاغط عليه برجلك مستقر وهادي ، اول ما تشيل رجلك ينطر في وشك !

الظاهر الرئيس المؤمن كان عبقري ، وغن العبارة دي تنطبق علي العرب كلهم

ياولاد الغبية !

٠٢‏/٠١‏/٢٠٠٦

إخوان ، كلاكيت أول مرة !













مشكلة الحياة السياسية في مصر تتلخص في المثل المصري (أسخم من ستّي إلا سيدي) !

يعني لا حكومة عِدلة ، ولا يسار عِدل ، ولا حتي يمين عِدل !

إحتمال أخدهم واحدة واحدة كده ، بس المشكلة في الوقت والمزاج الرايق للكتابة ، عموماً هاقولكم النهاردة حدوتة ظريفة علي (الإخوان المسلمون) ..

كان إعتقادي دايماً انهم بيرفضوا الأخر ،وغير قابليين للنقاش ،وهمّا التوكيل الرسمي والوحيد للإسلام ، أما غيرهم فحاجة م الاتنين :

1 - كفرة ولاد كلب !
2 - أخوهم في الإسلام ، بس لازم يهدوه إلي طريق الحق والصواب ، وإلا أنضم لمرتبة - أوسخ من الكفرة ولاد الكلب- وهي أعداء الإسلام المندسين علي الإسلام ، وهم -في وجهة نظرهم -المفروض يعدموا علي الخازوق أو تطار رأسه بالسيف جزاءً علي أفعاله الشنعاء اللي هي مجرد انه بيقول رأيه !

لكن الملاحظ أخيراً أنه زي صراع مكتوم -حتي لو نفوا ده - داخل الاخوان يبين مصيبة مصر السودا ، وهي الحرس القديم والحرس الجديد ، هات من الحزب الوطني واعمل قص ولصق ،هتلاقي نفس العجينة بتاعتهم ، بس مع الفرق أن الحرس الجديد في الحزب الوطني كلهم نصابين وأفاقين ، لكن ببدل وكرافتات ، وساكنين في كامبينة واحد ةفي 6 أكتوبر ، أما الجيل الجديد في الإخوان فبأعترف أنهم فيهم ناس - عي حسب ما رأيته من أرائهم - يعتبروا مجددين فعلاً زي "عبدالمنعم أبوالفتوح"..

التدوينة دي هاتكلم علي الحرس القديم شوية ،ويمكن التدوينة الجاية ع الحرس الجديد والإخوان بصفة عامة ..

الحرس القديم في الأخوان ياسادة زيه زي الوكسة السودا بتاعت كل العرب ، كبر في السن ، خبث في طريقة التعامل ، متّبتين في الكرسي كأنهم فلتة زمانهم وما فبش غيرهم ،إنتهاءً بمصيبة أن المرشد العام بيفضل في الكرسي لأخر العمر !

طب يجي منين إصلاح وهما ع الحالة دي ؟
إزاي ينادوا بإن الريس متقال يبقي في الكرسي مدتين بس ، والمرشد قاعد ومتّبت في الكرسي وفي الأاغلب ها يدفنوه بيه ومعاه كام قلة قناوي ، وبعدين يبقوا يشتروا كرسي جديد !

المصيبةمش في كده وبس ، المصيبة الأكبر في إسلوب تعاملهم مع معارضيهم ، أو حتي اللي كانوا منهم و انفصلوا بفكر مغاير بعض الشيء ..

حزب الوسط أكبر دليل علي اللي أنا بقوله..

"ابو العلا ماضي" وكيل مؤسسي حزب الوسط إعترض علي مزاعم "محمد مهدي عاكف" في قناة المحور بإن الإخوان كانوا علي علم بقيام حزب الوسط ، وهي محاولة خبيثة منه لجعل الحزب مرفوض في العديد من الاوساط ..

المهم "ابو العلا" عاتب الراجل ان كلامه

مش مضبوط ، لكن "مهدي عاكف" أصّر علي كلامه ، راح "ابوالعلا" قاله م الأخر : ربما يكون عامل السن والنسيان له أثر !

يعني بصريح العبارة : ياراجل ياكهنة ، بدل ما أقولك إنت كداب بقولهالك بطريقة تانية : أنت كبرت وخرّفت ..

" مهدي عاكف " ما سكتش وراح شاتمه في التليفون -إدام الناس كلها - وقاله : انت كداب وقفل السكة !

أدي ياسيدي وسيلة الحوار بتاعت الحرس القديم ..

تقدر تفرق لي بين الريس "متقال" و "مهدي عاكف" ؟

لو لقيت الفرق إتصل بـ 09000500

ويريدون أن يدخلوا الجنة ، ياخي: ......

حكومة " نظيف " ، تغسل أكثر بياضاً !

مصر من الدول القليلة اللي في العالم اللي فيها عدد الوزارت دي -30 وزارة بعد التعديل الوزاري الجديد -..

المشكلة فعلاً ان الوزارة الجديدة بقي سيطرة رجال الأعمال عليها مكتسح بعد ما كان علي إستحياء في الوزارة اللي فاتت ، عندك مثلاً " محمد منصور" صاحب توكيل (شيفورلية) في مصر - ده غير شغل المقاولات بتاعه - ،كمان " أحمد المغربي" صاحب شركات السياحة المشهورة ،وغيرهم..

المشكلة مش في دي بس! ، المشكلة كمان في الإعتقاد السائد لدي الناس ان الوزير لازم يكون من نفس مجال الوزارة اللي هايرأسها !

ياناس..ياعالم :وزارات مصر أيام حزب الوفد كانت غير كده بالمرة ،الوزير كان تبع الحزب ، الوزير منصب سياسي مش منصب إداري ،لكن تقول لمين؟

الكل ها يقولك لازم الوزير يبقي من نفس مجال العمل اللي ها يمسك وزارته !

علي العموم مش هاتفرق كتير ، الوزير في مصر زيه زي قلته ، وكله بناءً علي تعليمات السيد الرئيس ،وطبقاً لتوجيهات الريس متقال ،وهو تقريباً مالوش شغلانة إلا البقين الحمضانين دول ..

" أحمد رجب" كان إقترح أن الوزارة تبقي 3 وزراء بس ؛ واحد عشان بناءً علي تعليمات السيد الرئيس ، والتاني يقف في المطار ، والتالت - من عندي- عشان يبقي كبش فداء لأي مصيبة تحصل في البلد ، إبتداءً من أن صباع الريس متقال بيزغزغه نهاية بأن البلد إحتلها الصعايدة !

سعد زغلول قالها من زمان : مافيش فايدة ، غطيني وصّوتي يا " صفّية " !

٠١‏/٠١‏/٢٠٠٦

الأسد وخدام



"عبدالحليم خدام"

أثبت المثل المصري : (مش كل الطير يتاكل لحمه) !

للأسف هو ده حالنا كعرب ، وسوريا مثال صغير لدكتاتورية الأنظمة العربية ، "حاقظ الأسد" عايز يورث إبنه وأدي اللي ناب سوريا من ورا مجايبه !

من ساعة ما شفت "بشار" أساساً وأنا مش عارف ليه - لله في لله كده - حاسس بالحالة السودا اللي هاتوصلها سوريا ..

يالله علي راي الشاعر المجهول :

أنا كنت فاكرك فارس يا واد
ولكل جواد كبوة
أتاريك أسد ياواد
وأم الاسد .......

تحب تأخد كرسي معسل ؟ولا كرسي وزارة ؟!!

وبدأ العام الجديد !

قررت مؤقتاً أن أن أتمرد علي كل شيء ، وأجلس امام التليفزيون بناء علي توصبة من
صديق عزيز بيقول :

"إبراهيم عيسي " علي العاشرة مساءً

أنا -في عقل بالي- : وماله البرنامج يستحق فعلاً أن الواحد يتفرج عليه ، وأنا من
المعجبين بـ " مني الشاذلي " والبرنامج عموماً..

فتحت التليفيون يا محترم ،لقيت "إبراهيم عيسي " و "وائل الإبراشي " وفي وسطهم
الولية الهابلة "نجوي إبراهيم " - اللي بتحط طينة في شعرها !-

ماعلينا مش مشكلة الواحد هايكمل وخصوصاً مع سخرية "إبراهيم " اللي مش هامه أي حاجة
وعمال يدوس في الكل شما ل، وأما قالت "نجوي" :إنها عايزة تبقي ((نائب رئيس
جمهورية)) - بفتح الجيم - كما نطق الإخوة الفلاحين ، راح " إبراهيم " قالها : ما
تبقي رئيس جمهورية علي طول ؟

طبعاً الولية الهابلة وشها جاب ألوان ، و"مني الشاذلي " جحاولت تلطف الجو شوية ،
وصهينوا علي الموضوع !

أه..أنا نسيت أن أقول لسعادتك أن موضوع الحلقة كان عن مجلس وزراء إفتراضي ، أو كما
يسمونه (مجلس وزراء الظل)..

شوية شوية وجات مذيعة هابلة تانية بتاعت برنامج أسمه ( فن أونلاين ) ودي ولا ليها
في التور ولا الطحين و ،وقعدت بتهش تنش ..

شوية كمان -معلش إستحملني- وجه بني آدم قميء إسمه أحمد شوبير ، وده مثال للكفتة في
مصر!

واحد كان حارس مرمي فاشل ، وهوب بقي مقدم برنامج رياضية ، وهوب عضو مجلس شعب !

علي رأي دكتور عندنا في الكلية أما بيلاقي حاجة مش عاجباه بيقول : ده شغل عبده
كفتة!

وفضلوا يناقشوا -سعادتك - البلوي اللي عملتها وزارة الداخلية مع اللاجئين السودانين
- هما مش بلوي واحدة - ، ودخلوا شوية علي موضوع مذبحة "بني مزار" في المنيا ،
وبعدين جابه سيرة الوزارة الجديدة بتاعت أحمد نظيف -والقطنة ما بتكديش- ، وفؤجت
ب"إبراهيم عيسي" بيقول أنهم قرايب وولاد خالة وولاد طنط فتاكات ، وكلهم ساكنين في
كامبينة واحد ةفي 6 اكتوبر ..


"مني الشاذلي" تقوله : ما تبقاش متجني !

" إبراهيم عيسي " يقولها : ماهو " عاطف صدقي " كان بيحط إصحابه وحبايبه في الوزارة
، وكان أي حد يلاعبه طاولة يقوله :

تأخد كرسي معسل ؟ولا كرسي وزارة؟؟